سلامو عليكم
معلش البوست دا انا هوجه الكلام لريم صديقتي الصدوق
_________________________
إذيك يارمشو
انا كان المفروض هشوفك بعد بكره
ولو تعرفي كان نفسي اشوفك قد ايه مش هتتخيلي
بس طلعلي تدريب لازم احضره بوظ كل حاجه
فقررت اكلمك هنا
عارفه كان نفسي اشوفك ليه
كان نفس احس زي زمان رغينا ورخمتنا علي بعض
نبعت لبعض رسايل ع الموبايل واحنا اصلا جنب بعض ع السرير قال ايه
عشان محدش يعرف هنقول ايه
فاكره لما كنتي بتذنبيني قدامك وانت بتذاكري
ونهال تقولك سيبيها تقوم تنام تقوليلها لا انا كدا مرتاحه
فاكره كااااااااام مرة اتخانقنا من غير محد ف البنات يعرفو
وكان دايما الخناقه بسبب اني اتصرفت غلط ف حق نفسي
او عملت حاجه جيت علي روحي فيها
فاكره كام مره زعقتلك عشان كنتي غلطانه ومرديتيش علي
فاكره كام مره احتجتك ولاقيتك وقت مكنت عاوزاكي من غير مقول
كام مره بصيتي لموبايلك عاوزاني اتصل واتصلت
كام مره رجعت مخنوقه من امتحاناتي ومكنش قدامي غيرك ارمي نفسي ف حضنك
ريم
كل الناس كانو شايفينك قاسيه
وكانو شايفينك بتقسي علي بالخصوص
انا عمري مشوفتك كدا
انت كنت احن حد عليا ولو قسيتي كمنت بتقسي عشان مصلحتي
كنت امي فتوقيت كلنا اهالينا بعيد عننا
ف المدينه الجامعيه كنا عايشين بعيد عن اهلنا بس انت كنت دايما امي
لو قاسيه مكنتيش جريتي ف الشارع زي المجنونه لما عرفتي اني تعبانه
ولا كنتي سهرتي ف الشارع للساعه 1 باليل
عشان تجيبيلي اللبس اللي هحضر بيه مناقشة المشروع بتاعي
ف الاخر
انا يمكن لو كنت شوفتك كان في حاجات كتير اوي غلط عملتها مكنتش هحكيلك عنها
لاني عارفه انك مش هتسكتيلي ف الغلط
بس كان وجودك جنبي وبتتكلمي ومعرفتي اني مع صديقة عمري
هيخليني اخد القرار الصح واخرج من الحاله اللي مش عارفه هي هتخلص امتي
يمكن تخلص لما اشوفك او قبل كدا بس عاوزة ااقولك
انك مهما بعتي او الوقت فرق بينا انت كسرتي القاعده بتاعت البعيد عن العين
لا يارمش
انا يمكن بعدك قلت جملة
u r my best
لكتير اعرفهم بس انت غيرهم
مهما مثلت علي الناس اني مبسوطه انت الوحيده اللي بتقدري تعرفي ضحكتي معناها ايه
انا محتاجاكي اوي اوي اوي
واصعب حاجه ان ف عز مامحتجاكي
مش هقدر احكيلك مالي بس كان نفسي ارمي روحي ف حضنك واعيط وخلاص
وحشتيني يااغلي مخلوق ليا ف الارض
____________________________
ملحوظه يمكن ناس تشوف علاقتي بريم اوفر بس العلاقه دي فعلا موجوده
امضاء
زفتة هانم في اسؤا حالتها
هناك 9 تعليقات:
ربنا يخليكوا لبعض ويحفظكوا لبعض
يارب يابو حنفي يارب
متضايقه ليه كده
بلاش زفته
خليكى فله
ربنا يخليكوا لبعض
فعلا كلامك الصادق
هناك اشخاص يمثلوا لنا ضميرنا وعقلنا
هؤلاء هم فراملنا عندما نفقدها
وهم أيضا أحبائنا الذبن يريدوا مصلحتنا
أكثر الله من صديقتك , وحفظها وحفظك
ربنا يخليكوا لبعض دايما
و
يرزقني بواحدة كدة
ربنا يرجعكوا تاني لبعض ظي الاول واكتر
سلام عليكِ
اتمنيت كتير يكون ليا صديقه بمواصفات ريم ..
صعب اوي نلاقيهم في الزمن دا ..
خلي بالك منها واوعي تخسريها في يوم ..
ربنا مايحرمكو من بعض ..
ويرزقني بريم زي ريم صحبتك...
تحياتي
ربنا يخليكم لبعض
فعلا اجمل حاجه في الدنيا دي الصداقه
اول زيارة
وان شاء الله لن تكون الاخيره
ربنا يخليكوا لبعض يا يا رب
والبلوج جامد مووت بجد
وجامد اوي اسم قطران وزفته ده وكمان في في الكومنتس نعكشة
اموت واعرف بتجيبوا الاسماء دي منين? :P
إرسال تعليق