انجلو اراب( الله يرحم جددكو )

ازيكو

الكلام ده مش تجربه انا مريت بيها

لا دي حاجه الشباب بيعملوها وبصراحه فرسني بيها

الا وهي الانجلو اراب

حد حيقوم يقولي اتكلمي عربي يازفته مش فاهمين حاجه

ااقوله اتهد وااقعد لحد مخلص كلامي

الانجلو اراب بلغه الناس اللي بتفهم

هو العربي بس بحروف انجليزي

طب انا عاوزه حد يفهمني ليه انجلو اراب ماهو ربنا عرفوه بالعقل

ياكتب عربي

ياكتب انجليزي

لو مضايقني الاتنين اكتب اسباني مش مشكله

بس ايه الفايده العلميه اني اكتب الاتنين

حد حيقوم يقولي قولي بقي انك معقده من الانجليزي عشان كده مبتفهمهوش

حقوله لا انا مهندسه كمبيوتر قد الدنيا ومخلصه كل مستويا ت الانجليييييييييييش

انا مش حنكر اني مش ممتازه ف الانجليزي بس انا بفهم انجليزي كويس جدا واقدر اتلكم بيه

بس اتكلم واكتب بيه لسبب

يعني ف وقت

لازم اكتب فيهم انجليزي

ثم في حاجه كمان

الكتابه ع الكمبيوتر اصلا عشان تزود سرعتك او تحسن اللغه

الانجلو اراب ده بقي بيعمل ايه

انت كده لا بتزود سرعتك ف العربي

ولا بتحسن اللغه بتاعتك ف الانجليييييييييييييش

المصيبه اني لي واحده صاحبتي لقيتها بتقولي معلش يازفته مش حعرف ارد عليكي عربي

عشان انا بطيئه فيه

ممكن اكتب انجليزي قلتلها اكتبي

العين تكتبها 3

حرف ح تكتبه 7

الهمزه 2

يعني ربنا اداكو لغه سالكه تقلبوها انتو ليه

وف النص لقيتها كتبالي iam joking يعني انا بهزر

طيب مانت بتكتبي انجليزي اهوه

وانا فهمته مش جاموسه يعني

لازمتها ايه اللغبطه

حتقولولي ايه قلب عليكي المواجع وخلاكي تصدعينا بالموضوع ده

ااقولكو عشان متزهقوش

قطران اخويا شاعر وبيكتب بالفصحه

يعني العربي بتاعه حلو جدا

قووووووووووووووووووم الاقيه من يومين باعتلي الرساله دي

معني الرساله ايه للي مفهمش

انا اسف الجهاز رستر (يعني فتح وقفل ) لوحده والماسنجر علق

قارنو كده بين العربي والانجليزي

اصلا قطران كاتب الانجليزي غلط

يعني رستر حرف dبيعمل فيها ايه

بزمتكو مش حاجه تشل

يعني لا منها بيقينا عرب

وكتبنا عربي

ولا منها بقينا اجانب وكتبا انجليزي

حيحصل ايه لو كتبنا عربي طبيعي العين ع والحاء ح والهمزه ء

معلش لو صدعتكو بس الموضوع ده فارسني اوي

والنبي تقولولي رايكو انا معايا حق ولالا

يالا

سي يو انزر داي

(اشوفكو ف يوم تاني)

ده بقي اراب انجلو جات علي

امضاء

زفته هانم

ملحوظه:

اوعي تزعل ياقطران انا عارفه انك من هنا

ورايح حتكلمني عربي بس

لا اكتب براحتك انا قلت اتكلم عليك انت احسن ماخد زنوب علي حد غريب

تجربتي معاها

السلام عليكم

انا هاحكي تجربتي مع احلى واغلى شخص

عرفته

مع اختي العزيزه زفتة

كانت البداية لما لقيت فريند ريكوست على الفيس بوك

كان واحدة بتقول ان اسلوبي في الشعر عجبها

عملت اكسبت وانا فرحان ان الشعر بتاعي بقى منتشر

وبعدين كانت احسن حد يتابع الشعر ويقولي غلطاتي

ولما كنت بابقى مدايق ما تسيبنيش الا لما ابقى كويس

ومرة حصلت مشكلة كانت كبيرة بالنسبة لي

كانت بتدافع عني

وردت على كل الناس ردود جامدة جدا

ومن بعدها بقيت باحكيلها على كل مشكلة

وباخد رأيها وكانت على طول بتخاف على مصلحتي

وكانت اكتر حاجة قربت بينا انها برج حمل زيي

وكنا بنفكر نفس التفكير

بنزعل من نفس الحاجة

وبعدين اكتسبت ثقتها

وبقت تحكيلي

اللي مدايقها وكانت احلى لحظة في حياتي

وكنت باخد رأيها في كل شعر باكتبه قبل اي حد

وكانت بترد عليا بشعر برضه على نفس الوزن والقافية

انا مش لاقي كلام اوصفها بيه

عمري ليها شوية

انا حاولت اخلي الكلام يعبر عن مكانتها عندي

الكلام رفع الراية البيضا

وقالي دي ملاك نزلت من السما

انا هنا حبيت احكي تجربتي معاها

اللي مش شفتها

ولا شافتني

بس متأكد انه مش تقدر تستحمل تشوفني زعلان

ولو لحظة

وانا باقولها اني ادفع عمري كله

وانها اقرب لي من نفسي

انا باكلمها بكلام مش اقدر اجيبه مع نفسي

وفي الاخر

ربنا يخليكي ليا ومش يحرمني منك ابدا

امضاء

قطران باشا

حب الطفوله

علي راي الاستاذ احمد السقا الحب بتاع اول كل حاجه ده
ازيكو

حتقولو زفته مالها بتحب ولا ايه حقلكو استكو كالعاده واسمعوني للاخر

في ناس كتير اوي شايفه ان حب الطفوله اللي مفيش حد فينا معشوش هو مشاعر فاضيه او هابله ومجنونه

بصراحه انا شايفه العكس
دي ارق مشاعر بتخرج مننا لأن علي رأي واحد اعرفه كل مشاعرك بتبقي بينك وبين نفسك خارجه منك مش مستني ف المقابل حاجه

تبقي مبسوط اوي لو الشخص اللي قدامك ابتسملك او حتي سلم عليكوتزعل اوي لو كشر ف وشك مع انه ممكن ميكنش مكشر بسببك اصلا

انا بقي حب الطفوله بتاعي طول معايا شويه من اولي اعدادي لحد تانيه جامعه

بس الحق يتقال الست الوالده عملت معايا شغل جامد مش ضرب وبتاع لا

كانت بتسمعني

يعني مثلا ارجع من بره سعيده جدا ايه اصل الشخصيه الفظيعه شوفتها ف الشارع وضحكت

ماهو كل الناس اللي بقابلهم بيضحكولي عادي يعني

يوم تاني كنت عند صاحبتي وشوفته سلم عليا

امة لا اله الا الله لما بتشوفني بتسلم علي عادي يعني

إن جيتو للحق

انا لما بشوفه دلوقتي واشوفه وهو بيهزر معايا وافتكر انا كنت بفكر ازاي

ااقعد اضحك

اكيد

اكيد

عقلي كان مفوت ضارب ( هو لسه ضارب اي نعم) حبتين

بس الحمد لله ربنا شفاني من حب الطفوله

في ناس حب الطفوله بيكبر معاهم ويفضل هو حب حياتهم

وناس تانيه تفضل عايشه العمر كله شايفه اني دي احلي تجربه مرو بيها

انا شايفه

ان حب الطفوله هو اكترحاجه بريئه بيحس بيها الانسان

مشاعره بيضه متلوثتش اي حاجه تفرحه وااقل حاجه تضايقه

ياريت كانت مشاعرنا تفضل بيضه اوي كده علي طووووووووووووووووووووووووووووووووووول

مكنش حد غلب

بس كده

نسيت ااقولكو ماما كانت بتعمل ايه معايا

اي نعم هي كانت طابقه علي مراوحي بس اهم حاجه علمتهالي انها طول مانا بتصرف صح

حتفضل هي واثقه فيا

ودي كانت اهم حاجه حصلتلي

خرجت من حب الطفوله بثقه امي اللامحدوده

الحمد لله مصائب قوم عند قوم فوائد

ولنا لقاء ف تجربه جديده

إمضاء
زفته هانم
***************************************************

ملحوظه قطران اخويا ده والله ونعم اللإخوات

انا لما عملت التعريف بيا انا وهو كتبته هو فوق وانا تحت

دخل هو من غير حتي ميقولي وراح مطلعني فوق

اخلاق ياقطران والله

تبقي مصيبه لو مكنتش تقصد وجات معاك كده

هو وهي

هو : أحبها من كل قلبه
كان يشفق عليها احيانا من كثرة مما تحمل
اكثر كثيرا مما تحتمل
احب حتى غضبها
لعلمه التام انه عشقها كذلك
هي تغضب كالاطفال
غضب لذيذ فيه من العشق والحب
اكثر من العنف
مهما حدث سيبقى لها دائما
في قلبه انها كانت
اول واخر من اشعره بمعنى ان يحبك اخر
وياله من معنى

هي : أحبته من كل قلبها
كانت تعلم أن حبهما محال
وأنها لن تلقاه سوى في دنيا الخيال
فعلى صخرة الواقع..تتحطم الآمال
لكنها احبته رغم ذلك
أحبته .احبت صفاء نفسه
أحبت مشاكسته التي يخفي بها
مشاعره الفياضة نحوها ..وغيرته عليها ..
مهما حدث سيبقى له دائما
في قلبها أن كان
أول وآخر من أثبت لها أن بعض الاساطير قد تتحقق
ويالها من اسطورة تحققت

أمضاء

قطران

####################################

وبعد غياب

انا زفته يارجاله

البوست اللي فات كان جزئ من تجربه قطران عملها بس هو مكملش كتابتها

فقررت ارخم عليه وانزلها كامله

هي عباره عن دويتو شعر بينه وبين بنت

( لظروف خاصه مش حنعلن عن اسمها )

هو ( قطران)

هي( زميلة قطران)

ققرو وقولو رايكو

امضاء

زفته هانم

معنى اخر

احبها من كل قلبه

كان يشفق عليها احيانا من كثرة مما تحمل

اكثر كثيرا مما تحتمل

احب حتى غضبها

لعلمه التام انه عشقها كذلك

هي تغضب كالاطفال

غضب لذيذ فيه من العشق والحب

اكثر من العنف

مهما حدث سيبقى لها دائما

في قلبه انها كانتاول واخر من اشعره بمعنى ان يحبك اخر

وياله من معنى..................

تجربة خاصة

السلام عليكم

انا جاي اقول تجربة اللي عديت بيها
......................................................
انا الاول عشان يبقى عندكم خلفية
من الاقاليم
لما جيت في الكلية في اسكندرية
كان معانا
بنات من نفس البلد
بس كنت عادي
هما حبوا يبقى في كلام
بس انا كنت قفل زي ما بيقولوا
وشي بيحمر جدا
وباتكلم في حدود الدراسة بس
وفضلت على كده طول السنة
في سنة تانية
لما نتيجة اعمال السنة طلعت في مادة
الدرجة كانت من 35
انا جبت 26.5

كنا بناخد درس صغير عند دكتورة في امتياز
صاحبة اخت واحد صاحبنا

وكان في جايزة لأعلى درجة

طلعت الدرجة بتاعتي اعلى درجة

لما روحت الدرس
كان اصحابي بيتكلموا
وانا باسلم عليهم
كان واحد بيقولي ربنا يسهلوا عشان الجايزة
بس مش مستاهلة تعمل اللي عملته

انا سألته قصدك ايه ؟؟
ماردش عليا

طلعنا
والدرس بقى تمام
واحنا مروحين
كان في ناس اصحابي من زماان
لقيتهم بيتكلموا
وبقولهم يلا نروح
قالوا لأ
رايحين مشوار سوا
وهنتاخر وبعيد عن البيت عندي

وفي الكلية
كان كل اللي اعرفهم
بيبعدوا

سالت
بنت خالتي معايا في الدفعة
قلتلها انتي عارفة ليه بيعملوا كده؟؟؟؟

طلعت الموبايل
وقالت شوف الصورة دي

لقيت اسمي متصور في الكشف
وقدامه الدرجة
بس معمولة بالصاص

قالتلي قالوا انك عملت كده عشان تبقى الاعلى
قلتلها وانتي مصدقة؟
قالت الصورة على كل موبايلات الناس اللي من عندنا
قالتلي انها بتدافع عني
بس اصحابي بياكدوا الكلام للبنات

روحت سألت واحد كنت فاكره انتيمي
قالي بصراحة ايوة
وكل ما حد يقول انك ما تعملش كده
البنات يأكدوا للصبيان
والعكس

طبعا كانت ايام
لما اسافر باسافر لوحدي

وفي السيكشن مع ناس جديدة

روحت لواحد من اللي بياكدوا الكلام
بس عارف اني مش كده
قلتله مين اللي طلع الصورة من الاول؟
قالي مش عارف

قلتلها تعالى معايا القسم
والدكتورة هاتوريك درجتي
بس تنزل
لو سمعت كلمة اتقالت
شمش هايحصل طيب

وبعدين قلتله فلانة وفلانة اللي عملوا كده؟؟؟

قالي عرفت ازاي

قلتله شكرا

بس كانت ايام
لما ابقى مش عارف الاقي حد احكيله
وكل بيقول عليا غشاش
ولما اصحابي رجعوا
ما عرفتش ابقى زي الاول

والاحلى من كده
لما نتيجة مادة تانية طلعت
كانت سبعة من تلاتين

قلتلهم ماروحتش خلتها 17 ليه؟؟

ولما النتيجة طلعت اخر السنة

كانت الدرجات نزلت لأول مرة
في النتيجة

فكنت وسطهم
فقلت لواحد ما كانش راضي يصدق لاخر وقت

قلتله مليني الدرجات المداة كده؟
فلقاها 27 ونص

قلتله مش بالرصاص يعني

واحد بس صور النتيجة ووزعها على كل الموبايلات

بس كان الصعب موقف اصحابي

والاصعب اني قلت هو المفروض اهزر واضحك على كل حاجة واتكلم في الفاضية والمليانة عشان ابقى مش خنقة؟؟

دي التجربة
عايز اعرف رأيكم

امضاء
قطران
************************************************

تحديث

لظروف ليست خارجه عن ارادتي سوف اتغيب عن مدونتي العزيزه بس حسيبكو مع اخويا

قطران

هو اللي حيرد عليكو

نلتقي بعد الفاصل

زفته هانم

الجرح ( تجربه 2)

ازيكو
حد حيطلع ويقولي ايه التجربه اللي انت كاتباها دي
هو في تجربه اسمها جرح
حقوله اتهد واقعد واسمعني الاول
الفكره مش الكلمه
اللي ورا الكلمه
انت جرحت
او اتجرحت
ويمكن تكون جرحت نفسك

مفيش حد فيك يابر مصر كله معداش بالتجربه دي ( الجرح )
نبداء النكد
انا اغلب الجرح اللي اتعرضتله
كان من صحابي ودي اكتر حاجه

كانت بتجرحني
حد انا مقتنعه انه فاهمني اوي وف الاخر يطلع مش فاهمني علي الاطلاق

(جرح من حد غالي عندك)
كان اكتر جرح جاني لما واحده فيهم قالتلي زفته انت بقيتي فاضيه وموراكيش غيري
كان كل ده عشان مره من ضمن المرات اللي هي زعلتني قلتلها او حاولت اعترض
فجاه بقيت هي الملاك
وانا واحده فاضيه
عارفين مين اللي وقف ف صفي
اختها وطبعا كان لازم اطلع نفسي غلطانه عشان معملش مشكله بين الاختين

( عقده الاخوات بقي)

نوع تاني من الجراح ( جرح من حد كان كل همك تنصحه )
لما فكرت انصح اعز اعز صحابي وراحت مهجماني باسلوب فظيع
واول مره كانت دموعي تنزل بسبب الشخصيه دي انا يمكن ف الموقف ده مخترتش الوقت الصح اني اوجهلها النقد بس العلاقه بيني وبينها كانت تسمح بكده وباكتر من كده كمان

جرح من حد اديته كتير اوي

اوي وف الاخر تصرفاتك تبقي واجب هو مش شايف انك بتعمله حاجه حتي مفيش تقدير عادي

لما اضايق زفته موجوده

لما اتخنق زفته موجوده

لما اعيط زفته حتضحكني ( فاكرني بلياتشو )

لو عندي الكمبيوتر بايظ زفته حتصلحه

ميعرفوش اني سيبت شغلة الهندسه وبقيت بكل فخر( ببيع فول وطعميه )

كل ده ومحدش فيهم يفكر هي زفته مالها مش عاوزه حاجه

لا اصل زفته جامده ومبتتهزش سهل

نفسي اعرف مين اللي قال كده

انا لا جامده ولا نيله ( علا غانم ف فيلم سهرالليالي)

اهوه واحد قام يقولي هو انت اتجرحتي بس يازفته ومجرحتيش حد فاكره نفسك ملاك
حقوله والنبي ااقعد واسمعني للاخر احسن

انا جرحت اه
لما اروح راميه كلمه لحد قصادي وتوصله بمعني زفت مع اني والله مقصدش
اكتر حد جرحته كانت ماما
بنتناقش انا وهي وبابا
ورحت قايلالها انا لازم اجيب ولد لان اللي مخلفتش ولد تبقي مخلفتش اصلا

للعلم
ماما مجبتش غيري
واول مره كنت اشوف ماما عنيها مليانه دموع بجد وايه بسببي وبسبب لساني الزفت ده

كل المرات اللي جرحت حد كانت رمي طوب من لساني والله من غير قصد

لكن الايام اثبتت

ان اسواء جرح

علي الاطلاق

هو لما الإنسان يجرح نفسه

اه ممكن تجرح نفسك

لما تلاقيك بتتصرف تصرفات ترضي بيها غيرك وتيجي بيها علي نفسك

او لما تاخد قرار انك تجرح نفسك دلوقتي لانك لز سيبتها تفرح شويه حيكون الجرح اكبر بعدين

تبقي عارف اللي يفرحك فين ومينفعش تعمله

تحرم نفسك من حاجه عشان غيرك عاوزها وللاسف ف الاخر ميقدرش

بصو من الاخر

عشان انا عارفه ان محدش فاهم حاجه من كلامي اصلا

الموضوع ده كله انا عملاه عشان اعتذر لشخصين

1- اخويا الصغير ( قطران ) وبقوله انا مكنش قصدي اجرحك انا بس كنت عاوزه افهمك الوضع عشان تعرف تتعامل معاه بس انا مخترتش الوقت الصح للعلم ( قطران ف مقام اخويا وكنت اتمني يبقالي اخ زيه )

2- انا (زفته) بعتذرلك لان كل الجراح اللي اتجرحتيها كانت بسببي اني جيت عليكي عشان الناس وهما اصلا ميستاهلوش اي حاجه

وجيت عليكي اكتر عشان تعملي الصح

أنا اسفه لكل حد جرحته او لسه حجرحه

انا مقصدش صدقوني

مع تحيات

زفته هانم